Біблія князя Радзівіла

“Біблія князя Радзівіла”
Аўтар п’есы А.Унучак

Спектакль, прысвечаны Мікалаю Радзівілу Чорнаму, паставяць 10 і 11 чэрвеня ў Маладзёжным тэатры эстрады.
У гэтым годзе спаўняецца 500 год з нараджэньня аднаго з самых вядомых дзеячоў XVI стагоддзя князя Мікалая Радзівіла Чорнага. Мікалай Радзівіл Чорны быў лідарам руху Рэфармацыі ў нашай краіне, займаў найвышэйшую дзяржаўную пасаду канцлера Вялікага Княства Літоўскага, заснаваў друкарні ў Брэсце і Нясвіжы. У Брэсце было надрукавана больш за 40 кнігаў, сырод якіх славутая Берасцейская Біблія, якую яшчэ называюць Радзівілаўскай. А ў Нясвіжы ў 1562 г. пабачыў свет Катэхізіс хрысціянскай веры, падрыхтаваны Сымонам Будным. Як фактычны кіраўнік Вялікага Княства Літоўскага, Мікалай Радзівіл Чорны спрычыніўся да адной з самых удалых эканамічных рэформаў у нашай гісторыі – Валочнай памеры, а таксама да падрыхтоўкі другой рэдакцыі Статута ВКЛ. Імя Мікалая Радзівіла Чорнага ўнесена ў падручнікі па гісторыі Беларусі. У 2009 г. у г. Брэсце быў устаноўлены помнік гэтаму славутаму дзеячу нашай гісторыі і культуры.
500-годдзе Мікалая Радзівіла Чорнага шырока адзначаецца ў Рэспубліцы Беларусь. У лютым 2015 г. “Белпошта” выпусціла спецыяльны юбілейны канверт і марку, а Нацыянальны банк Рэспублікі Беларусь – 2 памятныя манеты “Мікалай Радзівіл Чорны” ў серыі “Умацаванне і абарона дзяржавы”. Па ўсёй краіне устаноўлены дзясяткі білбордаў з выявай чалавека, з імем якога асацыюецца час найбольшага культурнага і палітычнага ўздыму нашай краіны, Залаты Век Беларусі.
Творчы калектыў пад кіраўніцтвам актора і рэжысёра Нацыянальнага акадэмічнага тэатра імя Янкі Купалы Паўла Харланчука-Южакова таксама вырашыў зрабіць свой унёсак у адзначэнне 500-гадовага юбілею і паставіць спектакль “Біблія князя Радзівіла”. Дзеі спектакля пачынаюцца ў 1551 годзе. Мікалай Радзівіл Чорны знаходзіцца, здавалася б, на піку сваёй кар’еры, але раптоўна памірае сястра Барбара, каралева польская і вялікая княгіня літоўская, пасля – малодшы брат Ян, з якім у Мікалая былі вельмі складаныя адносіны і яны так і не прымірыліся, нарастае напружаньне і неразуменьне ў адносінах з жонкай Альжбетай.

Працяг спектакля 1г. 20 хвілін.