Другі Моладзевы тэатральны форум у Мінску

28 кастрычніка

Другі Моладзевы тэатральны форум краін Садружнасці, Балтыі і Грузіі адбудзецца ў Мінску 19-26 лістапада. Беларускія гледачы ўбачаць каля дзясятка пастановак з Азербайджана, Арменіі, Грузіі, Казахстана, Кыргызстана, Латвіі, Літвы, Малдовы, Расіі, Таджыкістана, Украіны, Узбекістана, Эстоніі. Купалаўская сцэна прымае некалькі з іх.

Першы Моладзевы форум адбыўся 6-13 чэрвеня 2012 годзе ў Кішынёве і быў закліканы сабраць пад адным дахам маладое пакаленне тэатральных рэжысёраў, мастакоў, драматургаў і крытыкаў з краін СНД, Балтыі і Грузіі, якія ўпершыню за 20 год з моманту атрымання незалежнасці гэтых краін маглі не толькі пабачыць і ацаніць вынікі працы сваіх калег, але таксама знайсці магчымасць для далейшага прафесійнага супрацоўніцтва. Менавіта купалаўцы прадставілі там Беларусь са спектаклем “Офіс” Кацярыны Аверкавай і атрымалі Гран-пры, пасля чего былі запрошаныя да ўдзелу ў Міжнародным тэатральным фестывалі імя А.П.Чэхава ў Маскве і Міжнародным тэатральным фестывалі ў Тбілісі 2013 года.

Сёлета Беларусь прадставіць Беларускі дзяржаўны маладзёжны тэатр са спектаклем “Чэхаў. Камедыя. Чайка” ў пастаноўцы Іскандэра Сакаева і Магілёўскі абласны тэатр лялек з “Гамлетам” у пастаноўцы Ігара Казакова.

Гледачы пазнаёмяцца не толькі з працамі маладых рэжысёраў, але і мастакоў – на выставе ў галерэйнай прасторы тэатра беларускай драматургіі. Лепшыя п’есы маладых драматургаў апублікаваныя ў спецыяльным зборніку. Сярод беларускіх аўтараў – Дзмітрый Багаслаўскі (“Внешние побочные”), Андрэй Іваноў (“Это всё она”) і Віктар Красоўскі (“Эшелон № 0” у суаўтарстве з украінкай Ірынай Гарэц).

Арганізатарамі форуму выступілі: Міжнародная канфедэрацыя тэатральных саюзаў, Міністэрства культуры Рэспублікі Беларусь, Мінскі гарадскі выканаўчы камітэт і Рэспубліканскі тэатр беларускай драматургіі пры падтрымцы Міждзяржаўнага фонда гуманітарнага супрацоўніцтва дзяржаў-удзельніц СНД.