Генадзю Гарбуку — 80. Віншуем!

Сёння Народнаму артысту Беларусі, лаўрэату Дзяржаўных прэмій СССР і Беларусі, знанаму акцёру Нацыянальнага акадэмічнага тэатра імя Янкі Купалы Генадзю Гарбуку спаўняецца 80 год.
Пра яго напісана і знята ўжо столькі, што сказаць штосьці новае складана. Але ўсё ж такі яшчэ засталіся малавядомыя рэчы з біяграфіі актора, пра якія варта ўзгадаць. Актор 007 (так называюць яго ў тэатральным коле, бо медаль, уручаны Генадзю Гарбуку як Дзяржпрэмія, быў пазначаны менавіта такім нумарам) нарадзіўся ў вёсцы Глыбачка Ушачскага района.У верасні 1941 года павінен быў пайсці ў школу, але сеў за парту толькі пасля вайны. Потым стаў адзіным хлопчыкам у школьным танцавальным ансамблі, нават кіраваў самадзейнасцю. І нягледзячы на гэта хацеў усё ж такі быць урачом, геолагам ці лётчыкам. Але стаў вучнем Дзмітрыя Арлова ў Беларускім тэатральна-мастацкім інстытуце. Некаторыя дрэвы і кусты, што можна ўбачыць каля Вялікага тэатра оперы і балета, пасаджаныя менавіта Генадзем Міхайлавічам – калісьці акцёрскае аддзяленне цяперашняй Акадэміі мастацтваў знаходзілася на першым паверсе опернага тэатра, таму студэнты часта займаліся акультурваннем прылягаючых тэрыторый. Першы выхад на купалаўскую сцэну стаў крывавым у прамым сэнсе слова – артыст прабіў цвіком нагу, калі граў у масоўцы спектакля “Паўлінка” і ішоў па лесвіцы за кулісы. Безумоўна, знакавай для артыста стала роля, нават ролі ў “Людзях на балоце” – спачатку Васіль Дзятлік у аднайменным тэлеспектаклі, затым у пастаноўцы Барыса Эрына на купалаўскай сцэне, а потым яшчэ і бацькі Ганны Цімоха Чарнушкі ў фільме Віктара Турава. Менавіта за выкананне ролі Васіля ў тэлевізійным спектаклі ўзнагароджаны Дзяржаўнай прэміяй Беларусі (1966 год), за выкананне ролі Чарнушкі ў мастацкім фільме Турава – Дзяржаўнай прэміяй СССР (1984). Першая роля Генадзя Гарбука ў вялікім кіно – камандзір партызанскага атрада ў “Паланэзе Агінскага” Льва Голуба 1971 года. Але вядомым ва ўсім Саюзе артыст стаў пасля выхаду ў 1983 годзе на экраны камедыі, якая ўжо даўно атрымала статус народнай, “Белыя росы”, дзе ён выканаў ролю старэйшага сына ў сям’і Ходасаў Андрэя. Народны артыст Беларусі Генадзь Гарбук яшчэ і ўладальнік медаля Францыска Скрыны (1995), лаўрэат прэміі “За духоўнае адраджэнне” (2007), лаўрэат Спецыяльнай прэміі Прэзідэнта Рэспублікі Беларусь (2004) і спецыяльнага прыза “За захаванне і развіццё традыцый духоўнасці ў кінамастацтве”, уладальнік прэміі Беларускага саюза тэатральных дзеячаў “Крыштальная Паўлінка” (2010).

Сёння яго імя сустракаецца амаль у кожнай афішы з купалаўскімі спектаклямі – Дзед Курыла ў “Сымоне-музыку”, Мікіта ў “Вечары”, Ціхон Пратасавіцкі ў “Пінскай шляхце”, Еўдакім Захаравіч Жыгалаў ў “Вяселлі”, Кучэра ў спектаклі “Не мой”, Чарнушка ў “Людзях на балоце”, Палкоўнік у спектаклі “Лістапад. Андэрсен”. Зараз Генадзь Міхайлавіч заняты падрыхтоўкай да новай пастаноўкі “Тата”, прэм’ера якой адбудзецца восенню 2014 года.