На завяршэнне 100-га сезона пакажам нашу легендарную “Паўлінку” 31 ліпеня ў Лідскім замку

21 Ліпеня
На завяршэнне 100-га сезона пакажам нашу легендарную “Паўлінку” 31 ліпеня ў Лідскім замку

У рамках святкавання 100-га сезона і адмыслова ў рамках праекту “Ліда – культурная сталіца Беларусі” Нацыянальны акадэмічны тэатр імя Янкі Купалы пакажа славутую “Паўлінку”. Паказ адбудзецца ў завяршэнні 100-га сезона Купалаўскага тэатра 31 ліпеня ў Лідскім замку а 18:00.

Яскравы, насычаны і запамінальны 100-ы юбілейны сезон Купалаўскага тэатра скончыцца на значнай ноце. У завяршаючы вечар спектаклі Купалаўскага тэатра пройдуць адразу ў двух гарадах Беларусі: у Мінску на Камернай сцэне пакажуць кранальную “Зямлю Эльзы”, а ў Лідзе – сапраўдны сімвал тэатра “Паўлінку”.

Легендарны спектакль “Паўлінка”, які з’яўляецца неад’емнай часткай рэпертуару Купалаўскага тэатра з 1944 года, завітае да жыхароў Ліды як шчыры падарунак на Дзень горада ад купалаўцаў. Найстарэйшы спектакль тэатра карыстаецца вялікай любоўю гледачоў і за доўгія гады свайго існавання ператварыўся ў сапраўдную візітоўку, сімвал Купалаўскай сцэны. Сакрэт такога ўнікальнага поспеху ў спалучэнні яскравых народных характараў, цікавага сюжэту, народных песень і танцаў, мілагучнай мовы класіка беларускай літаратуры Янкі Купалы і выдатнага майстэрства выканаўцаў.

Што тычыцца пакаленняў артыстаў, у ролі самой Паўлінкі выступілі ўжо больш за 10 артыстак, некаторыя з якіх выконвалі ролю на працягу многіх сезонаў і, захоўваючы традыцыйны малюнак ролі, стварылі адметныя характары: як кажуць, у кожнага пакалення гледачоў – свая Паўлінка. Напрыканцы 2019 года “Паўлінка” была ўключана ў спіс гісторыка-культурных каштоўнасцяў Беларусі.

Купалаўскі тэатр шчыра запрашае жыхароў Ліды і гасцей горада на паказ аднаго з самых знакамітых спектакляў Беларусі ў гістарычным месцы – Лідскім замку.

Паказ можна наведаць бясплатна.