Навiны
08.05.2012 » Лондан. 10 мая 2012 года
10 мая 2012 года на сцэне лонданскага тэатра Блумзбары адбыўся першы ў гісторыі паказ спектакля Нацыянальнага акадэмічнага тэатра імя Янкі Купалы ў Злучаным Каралеўстве.
Брытанскім гледачам была прадстаўлена нясвіжская арлекінада “Выкраданне Еўропы, альбо Тэатр Уршулі Радзівіл”, паводле літаратурных твораў княгіні Францішкі Уршулі Радзівіл у пастаноўцы мастацкага кіраўніка тэатра Мікалая Пінігіна.
Для паказу ў Лондане былі распрацаваныя і падрыхтаваныя адмысловыя матэрыялы: створаны англамоўныя афішы і двухмоўныя праграмкі-буклеты, падрыхтаваны мастацкі пераклад тэксту п’есы на англійскую мову, забяспечана сістэма сінхроннага перакладу, арганізавана тэматычная выстава ў фае тэатра. Усё гэта спрыяла больш дэталёваму азнаямленню гледачоў з тэатральным мастацтвам Беларусі эпохі барока, а таксама дапамагала ўспрыняццю сцэнічнага дзеяння.
Зала тэатра, якая налічвае больш за 550 месцаў была запоўнена на 100% і нават не змагла змясціць усіх ахвотных пабачыць пастаноўку. Гледачы надзвычай цёпла прымалі спектакль, жвава рэагавалі на развіццё падзей, доўга не адпускалі артыстаў са сцэны пасля заканчэння пастаноўкі.
08.05.2012 » Адмена спектакля
Паважаныя гледачы!
Па незалежных ад тэатра прычынах спектакль "Чорная панна Нясвіжа", які мусіў адбыцца 28 мая на сцэне Цэнтральнага дома афіцэраў, адмяняецца.
Квіткі можна вяртаць:
1. 28 мая ў Цэнтральным доме афіцэраў з 18.00 да 20.00;
2. у буднія дні па адрасе пр-т Машэрава, 25, пакой 601 з 12.00 да 18.00;
3. штодзень да 21 мая з 10.00 да 20.00 у касе тэатра па адрасе вул. Энгельса, 12. Рэжым працы касы пасля 21 мая просім удакладняць па тэлефоне (017) 3274237.
Адміністрацыя тэатра просіць прабачэння за адмену спектакля і спадзяецца на Ваша разуменне.
03.05.2012 » Фестываль у Кішынёве
Нацыянальны акадэмічны тэатр імя Янкі Купалы прыме ўдзел у Моладзевым Тэатральным форуме, які пройдзе 6-13 чэрвеня ў Кішынёве (Малдова). 10 чэрвеня на суд журы і гледачоў купалаўцы прадставяць спектакль “Офіс” паводле Інгрыд Лаўзунд у пастаноўцы Кацярыны Аверкавай. Паказ адбудзецца на сцэне Дзяржаўнага Рускага Драматычнага тэатра імя А. П. Чэхава.
У праграму форума спектакль быў адабраны Экспертным Саветам, які з кастрычніка 2010 па красавік 2011 года адглядаў спектаклі, пастаўленыя маладымі рэжысёрамі ў краінах СНД, Балтыі і Грузіі. Разам з “Офісам” у праграму ўключаны яшчэ 12 пастановак маладых рэжысёраў з Масквы, Бішкека, Баку, Вільні, Тбілісі, Кішынёва, Харкава, Ерэвана, Рыгі, Пракоп’еўска, Каршы.
У праекце таксама ўдзельнічаюць маладыя сцэнографы, драматургі, тэатральныя крытыкі з краін СНД, Балтыі і Грузіі, для якіх будуць ладзіцца выставы, майстар-класы, майстэрні і круглыя сталы. Форум арганізаваны Міністрэрствам культуры Рэспублікі Малдова, Міжнароднай канфедэрацыяй тэатральных саюзаў, Міжнародным тэатральным фестывалем імя А.П.Чэхава і Тэатральным саюзам Малдовы. Падтрымку ажыццяўляе Міждзяржаўны фонд гуманітарнага супрацоўніцтва Дзяржаў-удзельніц Садружнасці Незалежных Дзяржаў.
З падрабязнай праграмай форума можна азнаёміцца тут www.chekhovfest.ru.
30.04.2012 » Страта
Не стала Зоі Васілеўны Асмалоўскай, выдатнай актрысы, маці і найстарэйшай прадстаўніцы тэатральнай дынастыі Сідаравых-Асмалоўскіх.
Мы моцна смуткуем з нагоды цяжкай страты і ўсім сэрцам падзяляем боль сям’і. Нашы шчырыя спачуванні і самыя цёплыя словы падтрымкі накіроўваем у адрас Алены Юр’еўны Сідаравай. Няхай памяць, якая вечна жыве ў нашых сэрцах, і вера ў неўміручасць чалавечай душы стануць для яе апорай, дапамогай і крыніцай сілы ў гэтыя цяжкія дні.
Зоя Васілеўна Асмалоўская - актрыса тэатра і кіно, Заслужаная артыстка Рэспублікі Беларусь. Нарадзілася
1 сакавіка 1928 года ў Оршы. У 1952 годзе скончыла Беларускі тэатральна-мастацкі інстытут па спецыяльнасці "Актрыса драматычнага тэатра і кіно" (курс Д.А.Арлова), а ў 1954-м прыйшла працаваць у Дзяржаўны рускі драматычны тэатр (сёння - Нацыянальны акадэмічны драматычны тэатр імя М.Горкага), якому прысвяціла ўсё сваё творчае жыццё.
28.04.2012 » Замена спектакля
Паважаныя гледачы!
У сувязі з хваробай артыста спектакль "Памінальная малітва", які мусіў адбыцца 28 мая на сцэне Цэнтральнага дома афіцэраў, будзе заменены на спектакль "Чорная панна Нясвіжа".