Са святам роднай мовы, сябры!
І тым прыемней, што ў нашым Купалаўскім тэатры дзень роднай мовы адзначаецца штовечар разам з гледачамі – на спектаклях. Вось ужо 100 гадоў праз усе акалічнасці наш тэатр здзяйсняе пастаноўкі толькі на беларускай мове і знаёміць гледача з сусветнай класікай драматургіі, не адступаючы ад яе. І значыць захоўвае нашу найвялікшую каштоўнасць нацыі – беларускую мову. Нават прэм’ерны спектакль славутай “Паўлінкі”, што адбыўся ў эвакуацыі ў расійскім Томску ў 1944 годзе, быў на беларускай мове з беларускімі жартамі, песнямі і скокамі і меў неверагодны поспех у мясцовага гледача.
Сёння з нашай сцэны прамаўляюць на беларускай мове кароль Лір Шэкспіра, блазаніць Гогалеўскі Чорт, бароніць радзіму шляхціц Завальня. То шануйма і размаўляйма па-беларуску разам! А мы вам дапаможам.