Конкурс "Нацыянальная тэатральная прэмія" аб'яўляецца адкрытым!
Сёння адбылося адкрыццё VII рэспубліканскага конкурсу тэатральнага мастацтва "Нацыянальная тэатральная прэмія"! Ганаровым госцем мерапрыемства стаў першы намеснік Міністра культуры Валерый Іванавіч Грамада. З гэтага вечара на працягу амаль цэлага месяца нашы дарагія гледачы і паважаныя члены журы будуць знаёміцца з 32 самымі арыгінальнымі і выбітнымі спектаклямі ад 20 тэатральных калектываў нашай краіны. Свае заслужаныя ўзнагароды на сцэне Нацыянальнага акадэмічнага тэатра імя Янкі Купалы атрымаюць лепшыя тэатральныя пастаноўкі, а таксама лепшыя артысты, мастакі, рэжысёры і драматургі!
Першым спектаклем, паказаным у рамках конкурсу, стаў менавіта спектакль Нацыянальнага акадэмічнага тэатра імя Янкі Купалы "Апошні атракцыён" з удзелам непараўнальных Тамары Міронавай, народнай артысткі Беларусі, і Вольгі Няфёдавай, заслужанай артысткі Беларусі!