Народны мастак Беларусі (з 1990 года) і галоўны мастак Нацыянальнага акадэмічнага тэатра імя Янкі Купалы.

Нарадзіўся Барыс Федасеевіч Герлаван 25.12.1937 года на Украіне, навучаўся ў мастацкім вучылішчы ў Малдове і ў Беларускім тэатральна-мастацкім інстытуце. У Купалаўскі тэатр маладога мастака запрасіў знакаміты Армэн Грыгар’янц у 1962 годзе, менавіта пад яго апекай расцвіў і канчаткова аформіўся талент Барыса Герлавана. У 1962 годзе сумесна з В. Гардзеенкам Барыс Герлаван аформіў першы спектакль на легендарнай тэатральнай сцэне: “Зыбучыя пяскі” (п’еса П. Хайноўскага, рэжысёр – Леанід Рахленка).

Ужо ў 1976 годзе Барыс Федасеевіч стаў галоўным мастаком Купалаўскага тэатра, ён працаваў над афармленнем спектакляў выбітных рэжысёраў.

І сёння Барыс Федасеевіч Герлаван – важная фігура ў жыцці Купалаўскага тэатра, ён дагэтуль займаецца мастацкім афармленнем пастановак, на сцэне тэатра сёння ідуць непараўнальныя “Чорная панна Нясвіжа”, “Вечар”, “Гарачае сэрца”, “Пісаравы імяніны”, над якімі працаваў народны мастак. Ён – лаўрэат “Хрустальнай Паўлінкі”, уладальнік медаля (1998) і ордэна (2008) Францыска Скарыны, лаўрэат Дзяржаўных прэмій СССР і Беларусі, прэміі імя Еўсцігнея Міровіча, спецыяльнай прэміі Прэзідэнта Рэспублікі Беларусь за ўклад у выхаванне творчай моладзі.