Навіны

Сёння, 22 чэрвеня, мы адзначаем Дзень усенароднай памяці ахвяр Вялікай Айчыннай вайны і генацыду беларускага народа.

Супрацоўнікі Нацыянальнага акадэмічнага тэатра імя Янкі Купалы сабраліся каля мемарыяла, прысвечанага пакараным савецкім падпольшчыкам, каб ушанаваць памяць герояў і ўскласці кветкі.

Подзвіг тых, хто загінуў, назаўжды застанецца ў нашых сэрцах. Мы беражліва захоўваем і перадаем гістарычную памяць будучым пакаленням, каб не дапусціць падобнай трагедыі.

Адзначаем 100-годдзе са дня нараджэння народнага артыста СССР і БССР, лаўрэата Дзяржаўнай прэміі БССР, акцёра тэатра і кіно – Мікалая Мікалаевіча Яроменкі (старэйшага).

Для беларускай культуры ён стаў сімвалам нязломнасці і глыбокай чалавечнасці, якую немагчыма сыграць, калі яе няма ў душы.

Мiкалай Яроменка пайшоў на фронт падлеткам, трапіў у палон і нямецкі канцлагер. Вайна навучыла цаніць мір, жыццё і стваральную працу. Таму персанажы Мiкалая Мiкалаевiча вылучаліся ўнутранай сілай і прагай змен да лепшага.

Легендарнымі ролямі ў славутых пастаноўках сталі вобразы Канстанціна Заслонава ў аднайменным спектаклі М.Маўзона, Ніканора ў “Людзях на балоце” паводле рамана І.Мележа, Вяршылы ў “Мудрамеры” М.Матукоўскага, сэра Джона ў “Касцюмеры” Р.Харвуда і іншыя.

Мікалай Мікалаевіч кожны раз наноў перажываў перад залай тое, што калісьці выпала на яго ўласную долю. Мужны, рашучы, ідэйны – менавіта такім застаўся ў народнай памяці “герой Яроменкі”.

Сёння ў Нацыянальным акадэмічным тэатры імя Янкі Купалы прайшоў маладзёжны форум "Купалаўскае святло" (арганізатар РУП "Вытворчае аб'яднанне "Беларуснафта"). У рамках форуму абмяркоўваліся новыя магчымасці і будучыя праекты, праходзіла ўзнагароджанне прэміяй "Маладзёжны трыўмф-2026" за поспехі ў грамадскім жыцці!

Для гасцей адбыўся паказ спектакля «Дзядзечкаў сон».

Жадаем поспехаў усім удзельнікам форума!

13 чэрвеня запрашаем усiх у Ракаўскае прадмесце на казку "Гісторыя шакаладнага дрэва". Спектакль пройдзе ў рамках праекта "Тэатральная гасцёўня ў Ракаўскім дворыку", прымеркаванага да летняга музычна-турыстычнага сезона.

Наведайце тэатр пад адкрытым небам i правядзіце сямейны суботні вечар разам з Купалаўскім!

Пачатак у 17:00, вул. Ракаўская, 25-1.

Мы аб’яўляем кастынг у трупу Нацыянальнага акадэмічнага тэатра імя Янкі Купалы! Запрашаем акцёраў, якія маюць смеласць, талент і прагу да творчасці. Калі вы адчуваеце ў сабе патэнцыял стаць часткай нашага творчага калектыву, мы чакаем вашы матэрыялы.

Каб прыняць удзел у адборы, калі ласка, дашліце на пошту kadry@kupalauski.by:
- рэзюмэ;
- відэавізітку;
- шоурыл (пры наяўнасці).
У тэме ліста пазначце: «Кастынг».

Кастынг пройдзе з 21 па 23 ліпеня (час паведамім дадаткова). Заяўкі прымаюцца да 6 ліпеня.

Да сустрэчы ў Купалаўскім тэатры

У мінулую пятніцу прадстаўнікі Купалаўскага тэатра наведалі вялікую і дружную сям'ю Чарнюк. У доме, дзе пануе атмасфера любві і клопату, кожнае дзіця адчувае сябе патрэбным і важным. Рабяты атрымалі не толькі цацкі і прысмакі, але і карысныя рэчы для гаспадаркі. Малодшыя выхаванцы ахвотна паказалі свае падарункі і прачыталі гасцям вершы.

Маці-выхавацелька Святлана Чарнюк падзялілася планамі на летні перыяд. Яна адзначыла, што юны спартсмен Оскар працягне трэніроўкі ў школе №55, куды маці плануе аддаць яго на навучанне. А вось Марату заняткі спортам рэкамендаваў нейрапсіхолаг. Дзякуючы бацькоўскай падтрымцы кожнае дзіця ў гэтай сям'і развіваецца ў сваім кірунку і раскрывае асабісты патэнцыял.

У гэтым вялікім свеце кожны з нас можа стаць чараўніком. Асабліва тады, калі размова ідзе пра дзяцей. Часам дастаткова проста прыйсці ў госці і даць сваю ўвагу, каб зрабіць чыйсьці дзень ярчэй. Давайце ствараць маленькія цуды разам!

3 чэрвеня Нацыянальны акадэмічны тэатр імя Янкі Купалы прыняў удзел у творчай сустрэчы ў межах І Форума маладых літаратараў Беларусі. Юныя пісьменнікі абмяркоўвалі з рэжысёрамі вядучых тэатраў краіны свой уклад у культурнае жыццё i праблемы сучаснай беларускай драматургіі. Спікерам ад нашага тэатра выступіла памочнік рэжысёра Алеся Войтко.

Сустрэча праходзіла ва ўстанове "Заслужаны калектыў Рэспублікі Беларусь "Беларускі дзяржаўны маладзёжны тэатр".

Фота прадастаўлены Прэс-цэнтрам Дома прэсы.