Гастрольны каляндар

15 лістапада Нацыянальны акадэмічны тэатр імя Янкі Купалы наведае з гастролямі горад Ліду са спектаклем ART. Культавы спектакль Мікалая Пінігіна будзе паказаны у гарадскім Палацы культуры.

ART – адзін са спектакляў-візітовак Купалаўскага тэатра, які палюбіўся не толькі гледачам Мінска, але і ў іншых гарадах Беларусі і нават у Парыжы, дзе спектакль быў паказаны ў чэрвені 2016 года ў рамках Першых беларускіх тэатральных сезонаў у Францыі. У кастрычніку 2019 года спектакль прайшоў у горадзе Маладзечна – паказ наведалі больш за 400 гледачоў. Новая версія спектакля ART у рэжысуры Мікалая Пінігіна ідзе на Галоўнай сцэне Купалаўскага тэатра з 2015 года. Дарэчы, у Маладзечна адбудзецца 101 паказ спектакля.

"Псеўдаінтэлектуальная" камедыя вядомага французскага драматурга Ясміны Рэза распавядае пра трох 40-гадовых сяброў, якія перажываюць крызіс сярэдняга веку. "Псеўда" — таму што аўтар п'есы парадыруе і ўтрыруе разважанні пра сучаснае мастацтва, насміхаючыся над супрацьстаяннем мужчынскага самалюбства. Калекцыянер карцін Серж набыў белае палатно за шалёныя грошы. Ці рады за яго сябры? Ва ўсялякім выпадку, героі адчайна спрачаюцца. Чым жа скончыцца гэтая гісторыя пра мастацтва чалавечага паразумення? П’еса вядомага драматурга Ясміны Рэзы прыцягвае ўвагу многіх аматараў тэатра ва ўсім свеце – яе тэкст быў перакладзены на 35 моваў і пастаўлены ў шматлікіх тэатрах Еўропы.

Спектакль ідзе на беларускай мове. Рэжысёр-пастаноўшчык Мікалай Пінігін. Сцэнограф Аляксандр Арлоў. Мастак па касцюмах Людміла Ганчарова.

Пачатак а 19:00. Працягласць — 1 гадзіна 45 хвілін. Кошт квіткоў — 10-12 рублёў. Даведкі па тэлефоне 54-86-91.

З нагоды 100-га тэатральнага сезона Купалаўскі тэатр пашырае мапу гастроляў па Беларусі. Так, 3 снежня Гомель убачыць сапраўдную тэатральную сенсацыю мінулага сезону – спектакль “Рэвізор”. А 7 снежня знакавы спектакль “Вечар” рэжысёра Валерыя Раеўскага пройдзе ў Салігорску ў Палацы культуры. Паказ адбудзецца з нагоды 100-годдзя са дня нараджэння Народнай артысткі СССР Галіны Макаравай.

Нацыянальны акадэмічны тэатр імя Янкі Купалы 25 і 26 кастрычніка з аншлагам прадставіў у Гродзенскім абласным драматычным тэатры спектаклі “Рэвізор” і “Паўлінка”. Спектакль “Рэвізор” наведалі 452 гледача, спектакль “Паўлінка” – 630 гледачоў. Гродзенцы вельмі цёпла сустрэлі артыстаў тэатра і засталіся ў захапленні ад адных з самых папулярных спектакляў з рэпертуара Купалаўскага тэатра. Дарэчы, у абодвух спектаклях выконвала ролі народная артыстка Беларусі Зоя Белахвосцік, якая 26 кастрычніка адзначыла свой юбілей.

Нацыянальны акадэмічны тэатр імя Янкі Купалы 29 верасня 2019 года ў рамках міжнароднага фестывалю “Кірунак Усход” (Беласток, Польшча) прадставіў польскай грамадскасці і прадстаўнікам беларускай этнічнай меншасці спектакль “Пінская шляхта” паводле п’есы Вінцэнта Дуніна-Марцінкевіча. 

31 жніўня 2019 года Купалаўскі тэатр наведаў з гастролямі горад Слонім. 
Паказ спектакля "Вечар" адбыўся ў межах Дня беларускай пісьменнасці ў Слонімскім цэнтры культуры і адпачынку.

Спектакль тэатра імя Янкі Купалы «Радзіва «Прудок» у ліпені 2019 года адправіўся на гастролі «Палескія хронікі». Тур Купалаўскага тэатра па Беларусі пройдзе ў чатырох гарадах Брэсцкай і Гомельскай абласцей.