Гастрольны каляндар

Спектакль Нацыянальнага акадэмічнага тэатра імя Янкі Купалы “Пан Тадэвуш” 18 чэрвеня ўбачылі ў Парыжы больш за 600 гледачоў. Паказ пастаноўкі Мікалая Пінігіна паводле знакамітай паэмы Адама Міцкевіча адбыўся падчас Дзён культуры Беларусі ў Францыі. Яго арганізавалі па ініцыятыве Пастаяннага прадстаўніцтва Беларусі пры ЮНЭСКА. Праект падтрымалі пастаянныя прадстаўніцтвы Польшчы і Літвы пры ЮНЭСКА. Менавіта ў Парыжы 180 год таму Адам Міцкевіч і напісаў свой твор.

Трупа Нацыянальнага акадэмічнага тэатра імя Янкі Купалы вярнулася з гастроляў у Кітаі, дзе купалаўцы адкрывалі Пекінскі вясновы тэатральны фестываль. На сцэне Народнага мастацкага тэатра Пекіна тэатр прадставіў два спектаклі - "Вяселле" па А. Чэхаву і "Не мой" па А. Адамовічу. Кожную пастаноўку паказалі па тры разы. Дагэтуль у Кітаі бачылі толькі беларускі балет.

Спектаклем "Офіс“  Нацыянальны акадэмічны тэатр імя Янкі Купалы адкрываў 3 кастрычніка XII Міжнародны фестваль спектакляў "Мініфэст"  у Растове-на-Доне. Разам з беларусамі ў форуме прынялі ўдзел тэатры з Грузіі, Ізраіля, Македоніі, Расіі. "Мініфэст"  – адзін са старэйшых фестываляў для дзяцей і моладзі ў новай расійскай гісторыіі, арганізаваны ў 1989 годзе па ініцыятыве Уладзіміра Чыгышава, які быў галоўным рэжысёрам Растоўскага акадэмічнага маладзёжнага тэатра ў 1985-2005 гадах. У Растове-на-Доне купалаўцы выступілі ўпершыню.

95 сезон Нацыянальны акадэмічны тэатр імя Янкі Купалы пачаў у Томску. Менавіта там беларускі тэатр змог выжыць падчас вайны. Менавіта там паставіў сваю знакамітую “Паўлінку”. Менавіта там калектывам было прынята рашэнне звярнуцца да Савецкага ўраду з просьбай надаць тэатру імя Янкі Купалы – звацца купалаўцамі.